टेकु तिरबाट राता आँखा देखाउँदै मच्चिदै आएको राँगाले शहिद गेटमा आइपुग्दा छ जनालाई घाइते बनायो
काठमाडौं, ९ असार । काट्न लागेको राँगो रन्थनिँदै भागेपछि शहिद गेटमा खैलाबैला भएको छ । टेकु तिरबाट राता आँखा देखाउँदै जोडले मच्चिदै आएको राँगाले शहिद गेटमा आइपुग्दा छ जना मानिसलाई घाइते बनाएको छ । राँगोले शहिदगेटमा आइपुग्दा बाटोमा हिंडेका बटुवा र बाइकमा सवार यात्रुलाई हान्दै हिँडेको थियो । भने एउटा कारलाई हानेर शीशामा प्वाल पारिदियो । राँगोका कारण शहीदगेट क्षेत्रमा केहीबेर तनाव भयो भने ट्राफिक जामसमेत हुन पुग्यो । यसरी अनियन्त्रीत हुँदै भागेको मुर्छित राँगोलाई महानगरीय प्रहरी परिसर अन्तरगतको जनसेवा प्रहरी र नगर प्रहरीको टोलीले बल्ल-तल्ल घेरा हालेर नियन्त्रणमा लिएका छन्। प्रहरीका अनुसार राँगो टेकुतर्फबाट आएको हो । टेकुमा थुप्रै राँगा काट्ने वधशालाहरु छन् । बधशालामा काट्न लाग्दा राँगो मुर्छित हुँदै भागेको हुनसक्ने प्रहरीले अनुमान गरेको छ । राँगोको टाउकोमा एउटा सानो चोट छ भने सिंङमा रातो अबिर पनि देखिएको छ । राँगोलाई अहिले टुँडीखेलमा बाँधेर राखिएको छ ।
0 comments
Write Down Your Responses